Zarauzko Euskal Festak

Euskal Astea bukatu da Zarautzen, Euskal Festa egunarekin. Urtero irailaren 9an ospatzen den festa honetan, dantza eta musika (txistua eta soinu-txikia, batik bat) oso presente egoten dira egun osoan. Aurten, gainera, hainbat ikastaro antolatu ditu Udalak egun horri begira: Muxikoena, Larrain Dantzarena eta dantza-sueltoarena. Jende asko ibili da ikastaro horietan.

Euskal Festa egunean, Iratzarrin aritutako hainbat lagunek diana jotzen dute txistuarekin goizeko zazpietatik zortzi eta erdiak bitartean. Gero, bapo gosaldu ondoren, frantziskotarren komentuan ospatzen den Meza Nagusira joaten dira (izan ere, irailaren 9a Arantzazuko Amaren eguna ere bada). Han, ezpata-dantza egiten dute urtero. Goiko argazkian, iaz dantzan egin zuten hiru lagunak: Eneko Alberdi, Ion Alberdi eta Joan Luis Lizaso.